لخّصلي

جيت عالوزارة بسمعة محترمة وسيرة ذاتية نظيفة، بستة أشهر ما قدرت تجيب كهربا أكتر من ٣ ساعات، بس قدرت تجيب بواخر فيول مليانة تزوير وتلاعب، كنت معروف عنك بالآدمية والخبرة، بس الحقيقة إنّك صرت أداة بإيد لوبي المازوت والمولدات.

أوّل ما استلمت الوزارة قلت إنّو الخطط جاهزة بالوزارة وما ناقص غير التنفيذ. وهيدا إقرار واضح إنو وزراء التيار تركوا مشاريع وخطط، وإنت بس كان لازم تكمّل. بس الحقيقة إنّك ما نفّذت شي، لأنّ اللي عيّنك وزير صار يلقّنك ويملي عليك مواقفك.
جيت عالوزارة بسمعة محترمة وسيرة ذاتية نظيفة، وفجأة تحوّلت “قوات”. وصرت تردّد شعارات مش إلك. بستة أشهر ما قدرت تجيب كهربا أكتر من ٣ ساعات، بس قدرت تجيب بواخر فيول مليانة تزوير وتلاعب، وفرق الأسعار بملايين الدولارات. هون الآدمية ما اهتزّت، والضمير ما تحرّك.
أما بالنسبة للسدود: أوّلاً هاجمتها، وبعدين ركضت ع سد شبروح واعترفت إنّها ضرورية لدرء العطش. وعندما انكشف دور القوات بعرقلة إنشائها، رجعت تنكّرت للحقيقة وهاجمت التيار. يعني مواقفك متقلّبة بحسب التعليمات الجاييك من معراب.
ستة أشهر وإنت قاعد عكرسي الوزارة، وما لقيت ورقة وحدة تثبت فساد أو مخالفة لوزراء التيار. لو عنجد حابب تكشف الحقائق، روح على وزارة المال واسأل وزراؤها عن سبب تعطيل تمويل خطة كهربا ٢٤/٢٤. روح شوف ليش بعدنا عايشين ع تسعيرة ٥٠ ليرة للكيلووات متل أيّام رفيق الحريري، وبرميل النفط مسعّر ٢٠ دولار. هونيك بتعرف ليش مؤسسة الكهربا خسرانة.
للأسف، كنت معروف عنك بالآدمية والخبرة، بس يوم صرت “قوات” صرت موظّف صغير عند سمير جعجع، وصرت تكذّب وتتهم التيار بالباطل. غرّوك بالكرسي، بس الحقيقة إنّك صرت أداة بإيد لوبي المازوت والمولدات.
كنا شايفينك شاب مثقّف وخبير، بس اليوم عم نشوفك عم تدمّر سمعتك بإيدك.