Lakhasly

رأس رئيس أساقفة طرابلس المارونية، المطران يوسف سويف، قداسًا احتفالًا باليوبيل الفضي للخوري سيمون جبرايل في كنيسة مار جرجس – بحويتا يوم 20 أيلول 2025. وقد حضر القداس النائب العام، الأساقفة، كهنة، الأهل، والمؤمنين.

في عظته، شكر المطران سويف الرب على نعمة الكهنوت، واصفًا إياها بـ"القصة العجيبة الغريبة"، و"سر لا نفهمه". أكد على أن الكهنوت من الله، وليس من الإنسان، وأنّه تحقيق لحضور يسوع المسيح المنتصر على الموت. شدّد على أنّ الكهنوت ليس كهنوت موت أو يأس، بل هو كهنوت محبة وخدمة، يتجلى في حضور الكاهن المحوّل الذي يرافق المؤمنين في أفراحهم وأحزانهم.

ثمّ أثنى على الخوري سيمون جبرايل، مُشيرًا إلى تواضعه، وخدمته المميزة في التعليم والتنشئة، ورعايته للفقراء. ختم عظته بالتأكيد على أهمية محبة الله والالتزام بخدمة الكنيسة، مستشهدًا بكلمات يسوع "إرعى خرافي".

ترأس رئيس أساقفة أبرشيّة طرابلس المارونيّة المطران يوسف سويف السامي الإحترام
القدّاس الإلهي بمناسبة يوبيل ٢٥ سنة للخوري سيمون جبرايل في كنيسة مار جرجس – بحويتا وذلك يوم السبت ٢٠ أيلول ٢٠٢٥ وعاونه النائب العام، النوّاب الأُسقفيّون، و مجموعة من كهنة الرعايا، بحضور الاهل والمؤمنين.
وجاء في عظة سيادته:
"نعمة كتير كبيرة أننا نحتفل يا أحبّائي باليوبيل الكهنوتي الـ ٢٥ لخينا الخوري سيمون جبرايل بي بحويتا، بهالمكان يلي من ٢٥ سنة ربنا دعاه لحتى ينال نعمة الكهنوت المقدّسة، كنت عم إطلّع على هالصور الحلوة من ٢٥ سنة وعم برجع إستحضر هالوقت الجميل جدا يلي عشناه بالأبرشية مع رعية، مع إخوتنا الكهنة، مع الأحبار يلي غادرونا بحضور راعي الأبرشية المثلث الرحمة المطران يوحنا فؤاد الحاج وحضور ومشاركة المثلث الرحمة المطران يوسف الخوري ابن الضيعة إبن بحويتا وحضور الآباء والعيلة، كان جوّ كتير جميل جدا ونحنا بعد ٢٥ سنة ربنا سمح إنّو نرجع نتلاقى ببحويتا بهالمكان الجميل، بهالضيعة الحلوة يلي نحنا منحبها، يلي نحنا منقدرها، يلي نحن منقدر أهلها المقيمين والمنتشرين ويلي بدنا نشكرها على هالنعمة يلي عطيتها للكنيسة ابنها البار الطيب الكاهن الفاضل المتواضع العالِم المليان من روح الله الخوري سيمون جبرايل مبروك 25 سنة كهنوتك.
أمام الكهنوت ما في إلا الفرح، أمام هالدعوة الكهنوتية ما في إلا فرح القيامة، أمام المسيح يلي هو الكهنوت ويلي هو الكاهن الأول والأخير، يلي هو الكاهن الأوحد نحن بدنا نشكر الرب على هالعطية لي نحن البشر ما منستحقها ولكن من بعد أن تحل النعمة، تتذكروا ما بيصير بالرسامة، من بعد أن تحل نعمة الرب على هذا الإنسان، ساعتها الشعب يقول إنه لمستحق. بس قبل نحن بدون نعمة ربنا، لسنا مستحقّين، مين نحن لحتى الرب يعطينا ذاته؟ هذا يقول الكهنوت. الكهنوت قصة عجيبة غريبة يا أحبائي، كهنوت المسيح قصة جميلة، سحر، سر لا نفهمه. نحاول أن نكتشفه كلنا سوا، الكهنة، المطارنة، شعب الله الذي نحن كلنا سوا، كهنة يسوع المسيح بالمعمودية دعانا لحتى نشترك بكهنوته، كهنوت العهد الجديد، وصرنا شعب كهنوتي، شعب كهنوتي ولكن على مثاله ما هيك؟ أنت كاهن إلى الأبد على رتبة ملك صادق، هو ملك صادق رمز لمين؟ ليسوع المسيح عم يهيئ، عم يعمل إشارة ليسوع المسيح ملك السلام، منشان هيك كهنوتنا منّو منّا، كهنوتنا منّو، كهنوتنا من قلبه، كهنوتنا من فكره، كهنوتنا من أخلاقه، كهنوتنا من ذاته يلي قدمها بكليتها برضى تام إلى الله الآب على الصليب، ساعة الكهنوت الحقيقية توّجت كانت موجودة ما هيك؟ من آدم يلي سقط ورجع دُعيَ إلى الحياة ولكن توجّت من على الصليب وقت يسوع كلمة الله ابن الله الوحيد قدّم، هيدا الكهنوت، قدّم تقدمة، قرب قربان، ذاته بكليتها، ومعه وهو يسوع المسيح ابن الله وابن الإنسان يعني هو الإله والإنسان معاً قدّمنا معه من خلال بشريته يلي إتّحدت بالألوهة هو الكلمة الإله قدمنا معه إلى الله الآب وساعتها أصبحنا شعباً كهنوتياً إلى الأبد كهنوتي منشان هيك يا أحبائي نحن بفرح كتير كبير عم نشكر الرب بهالمسا على نعمة الكهنوت يلي هي تحقيق وتجسيد وتطبيق يومي تفصيلي رائع جداً لحضور يسوع المسيح يلي إنتصر على الموت وعطانا الحياة وعطانا الكهنوت بقيامته ودعانا لحتى نكون كهنة شهود لقيامته وشهود للحياة، لذلك الكهنوت ليس كهنوت الموت، ليس كهنوت الإحباط، ليس كهنوت اليأس والنّق، ليس كهنوت المنطق البشري الذي أحياناً نحن كهنة المذبح أو كهنة شعب الله أحياناً يدخل فينا هذا النوع من الكهنوت الذي يختلف عن كهنوت يسوع المسيح، كهنوت يسوع المسيح هو هذا الترتيلة الحلوي التي رتّلتها الجوقة الحلوي حقيقةً بهنّيكم، يلي هي من صلاة، هيدي صلاة البطريرك حويك رتلتها، يمكنكم أن تقولوا لي أول مطلعها: إلهي، قولوها، إلهي اجعلني أعيش وأموت برضاك، هذا هو الكهنوت: إلهي اجعلني أعيش وأموت برضاك، يعني تحقيق إرادة الرب، عيش إرادة الرب، عيش حضور الرب بحياتنا، بيومياتنا، ليس فقط في قلب الصلاة، من بعد الصلاة، من بعد القدّاس، بمسؤوليتنا في بتقديس العالم، نحن شعب كهنوتي، يعني بس نطلع من القربان الذي هو حملنا، نحن نحمله ما هيك؟ بالقربان نحمله، نتناول الرب ولكن هو حملنا وبيودينا اذهبوا بسلام لحتى نكون بقلب العالم ليتقدس العالم، ليتقدّس العالم، ليفرح العالم، لذلك حضور الكاهن بقلب الجماعة المؤمنة هو حضور لحتى يحول، حضور مُحوّل. أبيكليزيس آبائي الكهنة يعني الحضور المُحوّل، مين بيحوّل؟ الروح القدس، ماذا نقول بالقدّاس؟ إستجبنا يا رب، إستجبنا يا رب، إستجبنا وليأتي روحك الحي القدوس ويحل علينا، وعلى هذا القربان، يعني هذا الحلول، ما هو هدفه؟ التحوّل. حضور الكاهن بالقداس، وقت يكون موجود، يعني هو يسوع المسيح، لأنه ليس حاضر باسمه، حاضر بشخص يسوع المسيح، وإلا كيف ممكن هذا الخبز يصير شو؟ جسده، وهالكأس يصير دمه. حضور يسوع المسيح بإمتياز بشكل كامل لا نقص فيه. حضور الكاهن هو حضور محول، محول الناس التعبانة كتير حلوة هالباب الرائع جداً، شو مكتوب على هالباب؟ تعالوا إليّ، ما هيك؟ أنا مش آشع، وأنا أُريحكم، من خلال مين؟ ربنا بدّو يريّح الناس، من خلال كاهن بيزور الناس، بيتواصل مع الناس، بيحب الناس، بيتضامن مع الناس، بيشعر بألم الناس، وبيفرح بنجاح الناس، وبيكون حدّن، بيطلعاتن وبنزلاتن، بيصلبانن وبقامتن بيفشلن وبنجاحاتن، هيدا الكهنوت المحوّل. وإذا بدنا نعدّ اللآيحة مش رح نخلّص الليلي لأنه بالمعمودية في تحول، وبالميرون في تحول، وبالإكليل في تحول وبالتوبة ياللي بيسمعها، ياللي بيرفع إيده، تخيلوا هالمشهد، تخيلوا المشهدية الكاهن يللي بيرفع إيده لحتى إنسان عايش بالخطيّة والموت بيمنحوا الحلّة، الحلّ، الحلول، حلّ وتحول، وبيساعدوا بقوّة الروح القدس يتحوّل إلى إنسان جديد هيدي عظمي، ما اسمه خوري سيمون، وخوري يوسف، وخوري جريس، وخوري بطرس، اسمه يسوع المسيح بشخص هالكاهن هيدا شي رائع جداً، نعمة كتير كبيرة، سر ما منفهمه، قلتلكم ما منفهمه ليش بيصير هيك؟ كيف بيصير هيك؟ فقط منفهمه من خلال النعمة الإلهيّة، من خلال التواضع، منبلّش نفهمه، من خلال الإمّحاء، منبلّش نفهمها من خلال، اليوم كان في عنا الصبح بالأبرشيّة يوبيل الأوقاف وقلت للنائب العام كمان لحتى يعمل تأمّل ما هيك؟ ليش في كهنوت؟ لأي مجد في كهنوت؟ لمجد الله ولبنيان الكنيسة، فإذاً الكهنوت مش لمجدي، مش لبنياني، أنا عم بعمل أنا وإياكم بهاليوبيل فحص ضمير مش لمجدي الشخصي، مش لبنيان ذاتي، وبيئتي، وعيلتي، ومجتمعي والكلاون تبعي أبداً هو لمجد الله، وفقط لمجد الله، ولبنيان كنيسة يسوع المسيح هالكهنوت نحنا منعيشه من خلال حضور مريم يللي رافقت هالكاهن الأعظم ابنها بكل مراحل الحياة، سمعت الصوت قبلته بالبشارة وظلت معه وهو معها حتى الصليب والقيامة فالعنصرة  منشان هيك أمام صعوباتنا، أمام تحدياتنا عنا أم هي العذراء إلى جانب أم الخوري، ونحن اليوم بدنا نزقّف لأُم الخوري، إلى جانب أم الخوري أمّاتنا يللي هون وأُماتنا يللي سبقونا يللي أكيد عم يرافقوا بصلاتهم كل خوري، كل كاهن لحتى يثبت بالنعمة، لحتى يفرح بالمسيح، لحتى يتجدّد بالروح القدس، لحتى حياته كلها سوى ومماتوا هي لرضاه، لرضاه.
أبونا سيمون بدنا نقلّك مبروك، بدنا نقلّك يوبيل مبارك وأنا وإخوتك الكهنة وعيلتك وكل هالناس الطيبة يلي بيحبوك وجينا كلنا سوا لحتى نشارك، نشترك معك بفرح اليوبيل، بدنا نشكر الرب عليك انت ربنا مزيّنك بمواهب وبنعم، اذا بدّي بلّش عدّها كمان مش راح خلّص الليلة، بس خليني قول أبونا سيمون هو إنسان طيب متواضع ما بيحب الظهور بقلّو تيقدّم بيرجع خليفاني، بقلّو قدّم لإدّام بيقلّي لا خليني ورا، بمعنى انو بدو يعيش الكهنوت أكيد هو إفيكاس بالخدمة، سأخبركم عنه بس بيحب يعيش بهذا الصمت، بهذا السلام وبدون ضجة، وهذه نعمة كبيرة جدًا ربنا أعطاك ياها. عنده علاقة الحب مع يسوع، عنده أنو همّ يوصّل يسوع إلى كل الناس، أكيد بالتعليم وهو معلم كبير في الكنيسة تعرفوا هذا الشيء، مسؤول بالأبرشية عن التنشيئة ويشارك في عدة برامج تنشيئة على مستوى عالي جدًا. وإلى جانب التنشيئة ينشّئ طلاب الكهنوت في الإكليريكية. وهو مرجع يقصدوه من عدة مناطق مش بس من الأبرشية لحتى يساعدهم بالتعليم بالتوجيه بالإرشاد ولكن إلى جانب البعد الروحي واللآهوتي القرباني الأسراري هو بيقول بيكتمل الكهنوت بس أنا روح عند الفقراء منشان هيك هو من الأشخاص المحركين للبيت الدفيان، البيت الدفيان وغير البيت الدفيان وهذه قصة مهمة جداً لأنني لا أقدر أن أكون مع المسيح فقط بالأسرار وبالإنجيل وبالصلاة وما إطلّع بالإنسان البردان لحتى أدفيه بمحبتي وعنايتي وببيت بحاجة له وإلى جانب هالشي أمور كثيرة مسؤول عنها بالأبرشية، أبونا سيمون هو مسؤول عن برنامج البالغين يلي بدّن يتعمدوا بيجوا من عدّة ثقافات وأديان هو المسؤول عنهم التحضير مع إخوته الكهنة والعلمانيين بدنا نشكر رب عليك أبونا سيمون، على خدمتك ربنا يعطيك الصحة والقوة والعافية وإلى خمسة وعشرين غيرها، وخمسة وعشرين غيرها وخمسة وعشرين غيرها بالعطاء بالفرح بهالروحانية الحلوة يللي ربنا زينك فيها حافظ عليها وربنا بيكون معاك، والكنيسة بتحبك، ومطرانك بيحبك، وإخوتك حدك اليوم مع العائلة، مع كل شعب الله الناس الطيبين جايين لحتى نشكر الرب عليك، وجايين لحتى كمان نشكروا لأنه أحياناً كتير الرب بيوجعنا بالأسئلة، ما هيك سأل مار بطرس أتُحبني؟ بعد خمس وعشرين سنة عم بيقل لي، عم بيقول بار سيمون، أنا ما بعرف كم سنة صارو كتار أكتر يعني، بعد أتُحبني؟ يعني هو عم بيسألنا لحتى ينكزنا، لحتى يحكّنا، لحتى يهزنا، لحتى نحنا ننتبه أنو ما لآزم نحب غيره بهذه الدنيا، أنت تعلم يا رب نحن وإياك عم نقول أننا نحبك، وساعتها عم بيرجع يقلك إرعى خرافي، إرعى نعاجي، إرعى حملاني، مش بس هيك محل ما نحنا نكرناه  لحظة بحياتنا عم نعلن بالمكان ذاته محبته وعم نعلن قيامته وعم نعلن انه هو الكاهن الأوحد المخلص والفادي والحي والمُجدد حياتنا له المجد إلى أبد الآبدين، آمين."